طفلان بجلد أخضر ظهرا فجأة… وما قالاه حيّر العالم!

عيله امريكيه اسمها عيله جورمان

عيله صغيره بتتكون من الاب توم و الام الين و طفلين صغيرين

و فى يوم من الايام قرروا

انهم يشتروا مزرعه جديده و ينقلوا حياتهم و يعيشوا فيها

وابتدى الاب توم يدور على مزرعه تكون مناسبه و يكون سعرها معقول

وبالفعل لقى مزرعه كويسه ومساحتها كبيره

حوالى 512 فدان

و كمان كان سعرها مناسب جدا

المزرعه دى موجوده جنوب غرب مدينه بالارد فى ولايه يوتا الامريكيه

مكان معزول و بعيد شويه بس مش مشكله

اشتراها و اتنقل ليها هو و اسرته علشان يعيشوا و يستقروا هناك

مكنوش يعرفوا انهم اشتروا مزرعه مش عاديه

وانهم داخلين على اغرب تجربه مرعبه و مخيفه حيعيشوها فى حياتهم

المزرعه كانت مملوكه لزوجين كبار فى السن

سابوها و مشيوا من حوالى سبع سنين لسبب مش معروف

و فضلت المزرعه مهجوره طول المده دى

وفى سنه 1994 عرض عليهم توم انه عاوز يشترى المزرعه بتاعتهم

وهما وافقوا 

ولما جه يكتب العقد لاحظ وجود بند غريب جدا

البند ده بيقول انه مايحفرش فى ارض المزرعه ابدا 

الا بعد ما ياخد ازنهم الاول

وكانوا مصرين على البند او الشرط ده و الا البيعه مش حتتم

استغرب توم جدا من الشرط الغريب ده ومن اصرار الملاك عليه

انا حشترى المزرعه و حدفع تمنها و حتبقى ملكى

و من حقى اعمل فيها اى حاجه من غير اذن حد

بس فى الاخر كبر دماغه و مخدش الموضوع بجد ووافق

و تمت البيعه و اشترى المزرعه

المزرعه كانت مهجوره و محدش ساكن فيها لفتره طويله

علشان كده كانت محتاجه لتظبيطات و اصلاحات كتير

و يمكن دا كان سبب سعرها القليل اللى مايتناسبش ابدا مع مساحتها الكبيره

وبالفعل اتنقلت عيله جورمان لمزرعتهم الجديده و ابتدوا يشتغلوا و يصلحوا فيها

وبعد فتره قصيره ابتدت الظواهر و الحاجات الغريبه تحصلهم

فى يوم شافوا حيوان شكله غريب 

وفيه شبه من الديب بيحوم حوالين المزرعه

فراح توم جايب البندقيه بتاعته من جوا البيت

و اطلق عليه الرصاص اكتر من مره

وبالرغم من ان الاب كان متاكد ان الطلقات جت فيه فعلا و اصابته

الا ان المخلوق ده مامتش ولا حتى نزف ولا حصله اى حاجه خالص 

وساب المكان و مشى بهدوء عادى جدا

الاب و الام قالوا يمكن الطلقات مجتش فيه

وعدى الموضوع على كده 

و بعد كام يوم كانت الام الين سايقه العربيه بتاعتها 

و فجاه شافت نفس المخلوق ده و معاه مخلوق تانى شبه الكلب

الاتنين كانوا ماشيين بهدوء جوا المزرعه و مش باين عليهم اى نيه للهجوم

و بعد شويه سابوا المزرعه و مشيوا   

فاتصلت الين تانى يوم بهيئه حمايه الغابات 

و بلغتهم ان فيه قطيع من الذئاب البريه موجود فى المنطقه

و القطيع ده بيحوم حوالين المزرعه بتاعتها

وطلبت منهم انهم يعملوا اى حاجه علشان يقضوا عليه

بس الهيئه رفضت البلاغ واكدولها ان المنطقه دى مفيهاش ذئاب خالص

و ان اخر ديب كان فيها اتقتل فى العشرينات او التلاتينات من القرن العشرين

فافتكرت الين انها بتتوهم حاجات مش حقيقيه

يمكن علشان المكان لسه جديد عليها و مخدتش على الحياه فيه

خصوصا انها كانت بتشوف حاجات غريبه بتظهر و تختفى فى المزرعه

بس مكنتش بتقول لجوزها على الحاجات دى 

علشان كانت خايفه انه ميصدقهاش او يتريق عليها

وخلاص اقتنعت بان كل دى تهيؤات و نسيت الموضوع

لغايه ما فيوم كان توم راجع للمزرعه بليل 

و اتفاجئ باله الحفر بتاعته مقلوبه و متكسره

الاله دى كانت كبيره وتقيله جدا

يعنى مستحيل تكون الاولاد الصغيره هى اللى عملت كده 

الموقف ده خلى الين تتاكد انها مش بتتخيل

وان الحاجات الغريبه اللى بتشوفها دى حقيقه مش تهيؤات

فاتكلمت مع جوزها و حكتله على كل اللى شافته

و هنا اتاكدوا الاتنين ان المزرعه اللى اشتروها دى مش طبيعيه 

و ان فيه حاجات مريبه بتحصل فيها

و بعد ما اعمال النظافه و الاصلاحات خلصت

ابتدى توم ينقل الابقار بتاعته من المزرعه القديمه للمزرعه الجديده

وجاب ابن اخوه علشان يساعده فى الموضوع ده

وبعد ما الابقار كلها اتنقلت لمكانها الجديد

دخل توم و ابن اخوه للبيت علشان يرتاحوا و يتعشوا مع باقى العيله

و بعد العشا قرروا انهم يخرجوا و يلفوا لفه فى المزرعه

علشان يطمنوا ويتاكدوا ان كل شئ تمام و مفيش مشاكل

واول ما خرجوا من البيت اتفاجئوا بحاجه غريبه جدا

اول ما توم و ابن اخوه خرجوا من البيت

شافوا نور غريب و قوى جدا عامل زى نور كشافات العربيه موجود جوه المزرعه

فافتكر توم ان فيه حد دخل بعربيته جوه المزرعه بتاعته 

فمشى هو و ابن اخوه ناحيه النور ده 

علشان يشوفوا مين الشخص اللى اقتحم المزرعه وعاوز ايه

بس الغريب انهم كل ما يقربوا من النور يبعد عنهم و يرجع لورا

زى العربيه اللى بترجع للخلف كده

لغايه ما النور ده عدى السور وخرج برا المزرعه  

وكان توم فاكر ان العربيه المجهوله دى كسرت حته من السور وهى بترجع لورا

بس لما وصل لسور المزرعه اتفاجئ انه سليم تماما و مفيش فيه اى حاجه

الاغرب من كده ان النور اللى قدامه واللى كان مفكر انه نور عربيه

لقاه بيطلع للسماء ببطء وفضل كام ثانيه كده بيطلع لفوق 

لغايه ما وصل لارتفاع عالى جدا و بعدين اختفى 

دى كانت اول حادثه غريبه يشوفها توم بعينه

الحادثه التانيه حصلت بعد كام يوم

كان توم موجود فى بيته عادى

وفجاه وفى وسط النهار شاف جسم اسطوانى غريب طاير فوق البيت

و بيطلع منه صوت عالى و مزعج جدا

عامل زى صوت الحديد لما بيخبط فى بعضه

وبعدين الجسم ده اختفى تماما من غير اى اثر 

الحوادث الغريبه دى خلت توم يسال سكان المنطقه و الجيران القريبين منه

عن تاريخ المزرعه اللى اشتراها

فقالوا له ان المزرعه دى مزرعه ملعونه بلعنه قديمه خاصه بالهنود الحمر

اللعنه دى اسمها سكينوالكر

وان المخلوق او الحيوان اللى شبه الديب 

اللى شافه فى الاول و ضربه بالنار ومتاثرش 

يبقى هو نفسه المخلوق الملعون سكينوالكر

 

استمرت الحوادث الغريبه و الاحداث الغامضه تحصل لتوم و اسرته

و فى ليله من ليالى فصل الشتاء 

شاف توم اضواء غريبه فى السماء على شكل مثلث

فجاب بندقيه الصيد و بص من المنظار بتاعها على الاضواء دى

و اكتشف انه نفس الجسم الاسطوانى اللى كان طاير فوق البيت قبل كده

كان بيتحرك حركه غريبه و بعد شويه اختفى

مشكش توم ان الجسم ده ممكن يكون مركبه فضائيه

بس اعتقد ان المزرعه هى عباره عن بوابه زمنيه لزمن او لبعد تانى

يعنى حسب النظريه المعروفه اللى بتتكلم عن الاكوان الموازيه او المتعدده

طبعا كل اللى بيحصل ده و الحاجات الغريبه دى كلها

كانت مسببه ازعاج كبير لتوم و اسرته

وكانت حياتهم مش مستقره و مش مرتاحين

علشان كده قرر انه يبيع المزرعه المخيفه دى و يشترى واحده تانيه

وابتدى فعلا يدور على مشترى 

و فى يوم كان توم بيمر على الابقار بتاعته ولاحظ ان فيه بقره مش موجوده

ولما دور عليها شاف الاثار بتاعتها موجوده على الارض

الاثار كانت بتدل على ان البقره دى كانت بتجرى زى ما تكون بتهرب من حاجه

فتتبع الاثار دى و فضل ماشى وراها يمكن يوصل للبقره بتاعته

وفجاه اختفت الاثار مره واحده

زى ما تكون البقره نزلت تحت الارض اواترفعت للسما

وبعدها بكام يوم كان توم بيتمشى فى المزرعه ومعاه واحد من ولاده 

ساعتها ابنه شاف بقره من الابقار بتاعتهم غرقانه فى بركه ميه 

بالرغم من ان البركه دى كانت بركه صغيره وكان عمقها حوالى متر او متر و نص 

مش العمق اللى ممكن يغرق بقره يعنى 

ودى حاجه اثارت استغراب توم و ابنه جدا

ولما سحبوا البقره و طلعوها من البركه اكتشفوا انها من غير احشاء 

تم نزع الاحشاء بالكامل و بطريقه دقيقه جدا

و مكنش فاضل من البقره الا الجلد و العمود الفقرى و الراس بس

ومفيش حواليها اى اثار دماء 

او اى حاجه تدل على انها اتعرضت لهجوم من حيوان مفترس مثلا

الموضوع ده اتكرر اكتر من مره لدرجه ان توم قال فقد 14 بقره

منها اللى اختفى خالص و منها اللى مات لسبب مش معروف

و فى سنه 1996 باع المزرعه 

و اشترى واحده تانيه بعيده عنها بحوالى 24 كم

و اتنقل ليها هو و اسرته و ساب سكينوالكر

بس كان عنده فضول شديد 

وعاوز يعرف ايه اللى بيحصل بالظبط فى سكينوالكر

وايه اللى حصل للبقر بتاعه 

فاتفق مع اللى اشترى منه المزرعه انه حيسيب عنده كام بقره من بتوعه

زى طعم كده علشان يشوف ايه اللى حيحصل

و حيبقى ييجى كل فتره يبص عليهم

وكمان استعان بفريق متخصص فى دراسه الظواهر الخارقه و الغريبه

و طلب منهم يراقبوا المزرعه و اللى بيحصل فيها 

يمكن يوصلوا لاى نتيجه او اى تفسير للغز ده

و فى ليله 16 سبتمبر سنه 1996

الفريق ده شاف الجسم الاسطوانى الطائر واجسام تانيه مش معروفه 

و كمان شافوا الاضواء الغريبه اللى كان توم بيشوفها

وفعلا قدروا يصوروها بس للاسف الصور مكنتش واضحه بدرجه كافيه

و بعد حوالى سنه كامله لقوا احشاء البقره اللى كانت غرقانه

والغريب ان الاحشاء كانت سليمه ولسه بحالتها 

زى ما تكون لسه متشاله من البقره دلوقتى

مكنتش متحلله ولا متعفنه مع ان مر عليها وقت طويل جدا

الفريق ده قام بالتحقيق مع سكان المنطقه 

وسالهم عن الاحداث الغامضه و الحاجات الغريبه اللى بتظهر فى المزرعه 

ناس قالت انها لعنه الهنود الحمر

 

وناس تانيه قالت انهم الفضائيين و السفن الفضائيه 

و فيه ناس رفضت اصلا الكلام فى الموضوع

التحقيق ده استمر لمده 8 سنين كاملين

شاف فيها الفريق ظواهر و اجسام و حوادث غامضه وحاجات غريبه كتير

وبعد 8 سنين موصلوش لاى نتيجه ولا قدروا يفسروا اى حاجه

فوقفوا التحقيق فى الموضوع و مشيوا

انتشرت قصه مزرعه سكينوالكر واحداثها الغامضه فى المجتمع الامريكى كله 

و اتعمل عليها فيلم سينما وثائقى باسم سكينوالكر رانش 

ونالت اهتمام كل الناس اللى بتؤمن بالظواهر الغريبه 

و الفضائيين والماورائيات والحاجات دى

وطلعت نظريات كتير بتحاول تفسر اللى بيحصل فيها

اول نظريه هى ان المزرعه دى ملعونه بلعنه الهنود الحمر

و ان اللعنه دى اسمها سكينوالكر

تانى نظريه بتقول ان اللى بيحصل ده

هو عباره عن تجارب سريه للجيش الامريكى

والاجسام الغريبه اللى بتظهر هى اسلحه جديده الجيش بيجربها

زى اللى بيحصل فى المنطقه 51 كده

علشان كده اطلقوا عليها اسم المنطقه 51 رقم 2

اما النظريه التالته فبتقول انهم الفضائيين

وان الاجسام دى هى مركبات و سفن فضائيه

وان الكائنات الفضائيه هى اللى خطفت البقرعلشان يعملوا عليه تجارب

 

ونظريه رابعه بتقول ان كان فيه حضاره قديمه ومتطوره جدا 

موجوده زمان فى المكان ده

وان الحاجات اللى بتظهر هى بقايا من الحضاره دى

واخر نظريه شككت فى الموضوع كله

و قالت انه مجرد قصه الفها توم نفسه بهدف الشهره طبعا

بس الناس القريبين من توم و يعرفوه كويس

قالوا انه راجل صادق و لا يمكن يعمل كده

بدليل انه منع اسرته من الكلام فى الموضوع ده او الظهور فى وسائل الاعلام

طبعا كل دى مجرد نظريات واجتهادات مش مؤكده

و مفيش حد لغايه دلوقتى قدر يعرف حقيقه اللى بيحصل فى مزرعه سكينوالكر

كده قصتنا خلصت و اتمنى تكون عجبتكم

الى اللقاء فى قصة جديدة ان شاء الله

و السلام عليكم و رحمه الله و بركاته 

تعديل المقال