طفلان بجلد أخضر ظهرا فجأة… وما قالاه حيّر العالم!

الاساطير الاغريقيه القديمه

او الميثولوجيا الاغريقيه

هى مجموعه من الاساطير و الخرافات   

اللى امن بها اليونانيون القدماء

و اللى بتتكلم عن الالهه او انصاف الالهه 

و بتحكى عن الشخصيات الخارقه اللى كانت موجوده فى الوقت ده

ومن اشهر الاساطير دى اسطوره ميدوسا 

البنت الجميله اللى اتحولت لمخلوق بشع

شعرها الجميل اتحول لافاعى مرعبه

ونظرتها بتحول اللى قدامها لتمثال من الحجر

يا ترى مين هى ميدوسا

وايه سبب اللعنه اللى اتصابت بيها

وحولتها من بنت طيبه وجميله

لكائن مرعب و بشع بينهى حياه كل اللى قدامه

تابع القصة علشان تعرف حكايه ميدوسا و ايه هى حكايتها بالظبط

بس قبل ما نبدا فيه تنويه بسيط 

القصة دي بتتكلم عن اسطوره اغريقيه

يعنى قصه خياليه مش حقيقيه

وكلمه اله او الهه لما تتقال فى سياق القصه 

فهى بتعبر عن معتقدات و اساطير اغريقيه قديمه

احنا ملناش دعوه بيها و بعيدين عنها كل البعد

و معتقداتنا و ومفاهيمنا مختلفه تماما عنها

اعتقد كده الفكره وصلت

يلا باه نبدا القصه

ميدوسا هى واحده من تلت اخوات بنات اسمهم الجورجنز

والجورجنز فى الاساطير الاغريقيه

عباره عن تلت اخوات شكلهم مرعب

شعرهم عباره عن تعابين 

واى حد يبصلهم يتحول فورا لتمثال من الحجر

والتلاته دول اسمائهم

سثينو و ايرلن

ودول كانوا خالدين مش من البشر

والاخت التالته كانت ميدوسا

وكانت هى الوحيده الادميه فيهم

وكان ابوهم هو الاله سيتو

ميدوسا كانت بنت غايه فى الرقه و الجمال

وكانت بتثير اعجاب اى حد تقع عينه عليها

بس هى كانت معجبه اعجاب شديد باثينا

الهه القوه و الحكمه عند الاغريق

وكان املها الوحيد انها تكون كاهنه فى المعبد بتاعها

فوافقت اثينا بس كان ليها شرط واحد بس

و هو ان ميدوسا تفضل طول حياتها عذراء و متتجوزش ابدا

وبالفعل حافظت ميدوسا على الشرط ده و التزمت بتنفيذه

وكانت مخلصه جدا لاثينا

وعاشت لفتره طويله عذراء نقيه فى حرم المعبد 

لدرجه انها بقت كبيره الكهنه فى معبد اثينا 

ولانها كانت شديده الجمال

فكان الناس بيروحوا لمعبد اثينا علشان يشوفواها و يتمتعوا بالنظر ليها 

وفى يوم سمعت اثينا واحد من الناس دى بيقول 

ان شعر ميدوسا اجمل من شعر الالهه اثينا

فحست بالغضب و الغيره من ميدوسا

بس معملتلهاش حاجه ولا انتقمت منها

و فى يوم من الايام

كانت ميدوسا قريبه من شاطئ البحر

ساعتها شافها  بوسايدن اله البحار و المحيطات و العواصف البحريه

ولما شافها لفتت نظره و اعجب جدا بجمالها الشديد

وبما ان فيه عداوه كبيره بينه و بين اثينا

فقرر انه ياخد منها كبيره الكهنه بتاعتها اللى هى ميدوسا

و بسبب اخلاص ميدوسا لاثينا رفضت بوسايدن

و جريت على معبد اثينا تحتمى بيه و تستنجد باثينا

بس بوسايدن قدر انه يلحقها وقام بالاعتداء عليها بالقوه جوه المعبد

ولما عرفت اثينا باللى حصل غضبت غضب شديد

وبما ان بوسايدن كان من كبار الالهه وكان اقوى منها

مقدرتش تعاقبه او تعمله اى حاجه

فصبت غضبها كله على ميدوسا

وقررت معاقبتها لانها محافظتش على الشرط اللى بينهم

ودنست المعبد الخاص بيها

رغم ان مالهاش اى ذنب

و اللى حصل ده كان غصب عنها مش برغبتها

و بعد ما كانت ميدوسا بنت رقيقه و جميله

اصابتها اثينا بلعنه حولتها لمسخ مرعب و بشع

وشها اصبح مخيف جدا 

و اسنانها اتحولت لانياب زى انياب الافاعى

ولسانها بقى طويل و متشعب زى لسان الحيه

وشعرها الطويل الجميل اتحول لتعابين مخيفه

و جلدها بقى لونه اخضر و متغطى بالقشور زى الزواحف

و رجليها اختفت و حل محلها ديل طويل يشبه ديل الافعى

وكمان اى حد يبص فى عينيها 

يفقد حياته و يتحول فورا لتمثال من الحجر

بعدها سابت المعبد و سكنت مع اخواتها الاتنين 

فى كهف بعيد و معزول عن العالم

و اتحولت ميدوسا البنت الجميله لاكتر مخلوق قاتل و مرعب

وانتشرت قصتها بين الناس

و بعد ما كانوا بيروحوا للمعبد مخصوص 

علشان يشوفوها و يتمتعوا بالنظر ليها 

بقوا يبعدوا عنها 

و ما يحاولوش يتعرضوا ليها او يشوفوها حفاظا على حياتهم

وحاول كتير من الفرسان و المقاتلين قتل ميدوسا و قطع راسها 

علشان ينالوا شرف و مجد القضاء على الوحش المرعب ده

ويبقوا من ابطال الاساطير الاغريقيه و يتخلد اسمهم فيها

بس مفيش حد منهم قدر يهزمها او يقضى عليها

و اتحولوا كلهم لتماثيل حجريه ماليا المكان

فقرر المحارب بيرسيوس ابن الاله زوس كبير الالهه 

ودا كان محارب نصه بشرى و نصه اله

قرر انه حيقضى بنفسه على الوحش المرعب ميدوسا

وقررت الالهه انها تساعده و تديله اسلحه و ادوات 

تخليه ينجح فى مهمته و يتخلص من ميدوسا للابد

فاله البحاره هيرمس اداله حذاء باجنحه يساعده على الطيران 

و يخليه ينتقل بسرعه كبيره من مكان لمكان 

و اله العالم السفلى هيدس اداله خوزه تخفيه عن الانظار لو لبسها

واله الحداده و النار هيفست اداله سيف قوى و حاد جدا

يقدر يقطع بيه من ضربه واحده

اما اثينا الهه الحكمه و القوه

اعطته درع قوى من البرونز

يقدر يعكس الصوره و يحميه من نظرات ميدوسا

وشنطه حمايه خاصه علشان يحط فيها راس ميدوسا

تحميه و تحمى اى حد تانى من نظرات عينيها 

وصل بيرسيوس لمكان الكهف اللى عايشه فيه ميدوسا 

ومعاه الاسلحه اللى حصل عليها من الالهه

ولاحظ ان الطريق للكهف ده كان مليان بالجثث و التماثيل الحجريه

للمحاربين اللى سبقوه و حاولوا يقتلوا الوحش ميدوسا قبل كده و فشلوا

و بعد وصوله لبس الخوذه اللى بتخفيه عن الانظار ودخل للكهف

واستغل نوم الجورجونات التلاته

ميدوسا و اخواتها الاتنين

و باستخدام الاسلحه اللى معاه  

نفذ مهمته و فصل راس ميدوسا

اللى فضل محتفظ بقوته و قوه نظراته القاتله

فاستخدم الدرع البرونزى اللى معاه و حمى نفسه من نظراتها 

و حطها الراس فى الحقيبه اللى اخدها من اثينا

ولما حست الاختين باللى حصل لميدوسا

قاموا بالهجوم على بيريسيوس و حاولوا قتله انتقاما لاختهم

فلبس الخوذه اللى بتخفيه مره تانيه

وباستخدام الحذاء اللى بيمكنه من الطيران و الانتقال بسرعه

قدر انه يهرب منهم و يغادر الكهف

بعدها اهدى الراس لاثينا اللى حطته على درع الحرب الخاص بيها

و الاسطوره بتقول ان وقت موت ميدوسا 

كانت حامل من الاله بوسايدن

و اتولد ليها الحصان المجنح بيجاسوس و العملاق الذهبى كرايسور

واللى تم ذكرهم بعد كده فى كتير من الاساطير الاغريقيه كابناء لميدوسا 

و هنا بتنتهى قصه ميدوسا بطله اشهر الاساطير الاغريقيه

اسطوره البنت الجميله اللى اتحولت لوحش مخيف

عقابا على ذنب ارغمت عليه و كان غصب عنها

فى حين ان الفاعل الاصلى لم يعاقب و فلت بفعلته 

و الاسطوره دى كانت مصدر الهام لكتير من الشعراء و صناع الافلام

وكمان اصبحت رمز لضحايا الاغتصاب

اللى بيتم القاء اللوم عليهم و معاقبتهم رغم انهم هم الضحيه

وفى النهايه لازم نقول ان المصادر اليونانيه القديمه

واقصد هنا المصادر الاصليه

مذكرتش ان ميدوسا اتعرضت للاغتصاب

وبتقول ان اله البحار بوسايدن اعتدى على امراه شابه 

من غير ما تحدد هى مين او اسمها ايه

وكتير من علماء التاريخ مش متفقين على صحه ترجمه النص الاصلى القديم  

بشكركم جدا على حسن المتابعه

و ماتنسوش تسيبوا رأيكم في تعليق لو بتحبوا المحتوى اللى بنقدمه

والسلام عليكم و رحمه الله و بركاته

تعديل المقال