لغز "منارة ايليان مور" أين اختفى العمال الثلاثه؟

 

قامت بتحضير كيان مرعب داخل منزلها فقضى عليها (قصة اوليفيا و كيان التولبا المرعب)

 

المكان ولايه تكساس الامريكيه

الزمان 27 فبراير سنه 1994

فى اليوم ده استقبلت شرطه الولايه عدد من المكالمات الغريبه

لما كانوا بيردوا على المكالمات دى مكنوش بيسمعوا اى صوت من الطرف التانى

كان فيه حد موجود معاهم على الخط

بس مكنش بيتكلم خالص ولا بينطق باى كلمه او حتى بيديهم اى اشاره

مجرد صمت تام

فحست الشرطه ان الموضوع ده مش طبيعى وان فيه حاجه غلط

وان فيه حد بيستنجد بيهم و محتاج مساعدتهم

بس واقع فى ورطه او مشكله مش مخلياه قادر اوعارف يتكلم

فتتبعوا مصدر المكالمات و قدروا يعرفوا المكان اللى جت منه

وهو بيت السيده اوليفيا مابيل الموجود فى بلده سلينا

و بسرعه اتحركت داوريه شرطه لبيت اوليفيا علشان يشوفوا ايه الحكايه

ولما وصلوا خبطوا على الباب بس محدش رد عليهم

خبطوا اكتر من مره وبرضوا مفيش اى اجابه ولا اى صوت جوه البيت

زى ما يكون البيت فاضى و مفيش اى حد موجود فيه

فقرروا انهم يكسروا الباب و يدخلوا

ولما دخلوا لقوا البيت شكله غريب جدا

كان ضلمه جدا ومحتوياته كلها قديمه و مش نضيفه

و التراب و الغبار موجود فى كل مكان و مغطى كل حاجه

كأنه بيت مهجور و محدش ساكن فيه من سنين

واستمرت الشرطه فى التفتيش لغايه لما وصلوا لاوضه بابها مقفول

ولما فتحوا باب الاوضه كانت الصدمه

قصتنا النهارده هى قصه حقيقيه حصلت فعلا فى ولايه تكساس فى امريكا

قصه مليانه بالرعب و الغموض و الاثاره

وليها علاقه بتحضير كائن التولبا المرعب

اتعمل عليها فيلم رعب شهير اسمه ذا كوايت وانس

و لحد دلوقتى بتمثل لغز كبير جدا محدش قدر يفسره او يحله

وبتبدأ القصه فى قريه اسمها سيلينا فى ولايه تكساس

هناك كانت عايشه اوليفيا مابيل مع جوزها ترافيس ومعاهم ابنهم الصغير والوحيد ايدن

اسره صغيره حياتها مستقره و عايشين بهدوء و مفيش اى مشاكل

بس للاسف سنه 1990 اتعرض الطفل ايدن لحادثه غرق

فى واحده من البرك القريبه من البيت وفقد حياته

وفقد الاب ترافيس و الام اوليفيا ابنهم الوحيد اللى كان عمره وقتها 7 سنين بس

طبعا الموضوع كان صعب عليهم جدا خصوصا على اوليفيا

اللى سيطر عليها الحزن بشكل كامل و دخلت فى حاله من الاكتئاب الشديد

انعزلت تماما عن اصحابها و عن الناس كلها  

حتى شغلها سابته و قعدت فى البيت ومبقتش تخرج منه خالص

الحاله دى استمرت لفتره طويله لدرجه ان جوزها مقدرش يستحمل

فسابها و ساب البيت و اتجوز واحده تانيه علشان يكمل حياته معاها

وتعدى اربع سنين كامله و اوليفيا على نفس الوضع

مقيمه تماما فى البيت و مش بتخرج منه ابدا

اختفت و انعزلت تماما عن الناس ومحدش كان عارف عنها اى حاجه

لغايه يوم 27 فبراير سنه 1994

اليوم اللى جت فيه المكالمات الغامضه لمركز الشرطه زى ما حكينا فى اول الفيديو

المكالمات دى خلت الشرطه تروح على بيت اوليفيا و يخبطوا على الباب

و لما محدش رد عليهم كسروا الباب و دخلوا

ساعتها اتفاجئوا بحاله البيت السيئه

عامل زى البيت المهجور اللى محدش دخله ولا سكن فيه من زمان

و التراب مغطيه من اوله لاخره

لغايه ما لقوا اوضه بابها مقفول

واول ما دخلوا الاوضه دى

لاحظوا انها نضيفه و مترتبه بعكس باقى البيت

وكمان كانت مليانه بكميه كبيره من الشموع

واتفاجاوا بوجود جثه متعفنه لاوليفيا مابيل

الجثه كانت قاعده على كرسى هزاز ولابسه ملابس النوم العاديه

وماسكه فى ايديها عروسه من الخشب مصنوعه يدويا

وعليها قطع من ملابس ابنها ايدن اللى غرق

وكان قدامها مذبح زى اللى بيبقى موجود فى المعابد او الكنائس

المذبح كان مليان بالصور و الورود و الرسايل وحاجات تانيه كلها بتخص الطفل ايدن

بالاضافه لعلبه كان فيها رماد جثته

ومقدمه المذبح كان مكتوب عليها كلام غامض بلغه غريبه

اتضح بعد كده انها اللغه السنسكريتيه

واكتر حاجه غريبه لقوها هى رساله كتبتها اوليفيا بنفسها و بخط ايديها

كانت بتتكلم فيها عن مخلوق غامض او شئ مرعب خرج عن سيطرتها

الرساله كانت مؤرخه بتاريخ نفس اليوم اللى استقبلت فيه الشرطه المكالمه الغامضه

ونفس اليوم اللى اقتحمت فيه البيت وفتشته

ودا جزء من نص الرساله دى

يا أيدن أنا آسفة

آسفة جدا

لم يكن يجب علي أن أترك الأمر هكذا

سأغادر

أمك قادمة إليك يا إيدن يا عزيزي اللطيف

امك تحبك

الغريب فى الموضوع ان تشريح الجثه اثبت ان اوليفيا ماتت من اكتر من شهر

طب ازاى

امال مين اللى اتصل بالشرطه و مين اللى كتب الرساله

بعض افراد و ضباط الشرطه اللى اقتحموا البيت

قالوا انهم اول ما دخلوا حسوا باحساس غريب

زى ما يكون كيان غامض او شخص غريب موجود معاهم

حاسين بيه بس مش شايفينه

كان فيه شعور عام بالخوف و عدم الارتياح

لدرجه انهم طالبوا بحضور خبير او عالم بالارواح و الخوارق علشان يساعدهم

وبعد فتره من التحقيقات موصلتش الشرطه لاى نتيجه

فاتقفلت القضيه ومحدش عرف ايه هو سبب الوفاه ولا مين هو الجانى

وابتدت تظهر الاشاعات و الاراء و النظريات اللى بتحاول تفسر و تحل اللغز ده

ايه اللى حصل لاوليفيا

ازاى ماتت و ازاى كتبت الرساله بعد وفاتها بشهر و مين اللى اتصل بالشرطه

ومن اشهر الكلام اللى اتقال

الكلام اللى اكده فرانشيسكو سانتياغو

ودا واحد من الضباط اللى كانوا بيحققوا فى القضيه

وليه عم خبير و متخصص فى الماورائيات و الظواهر الخارقه

وهو ان اوليفيا عن طريق اجراء بعض الطقوس الوثنيه

نجحت فى خلق كيان غامض خاص بروح ابنها ايدن

الكيان ده اسمه التولبا

والدليل على كده هو المذبح و الحاجات اللى كانت موجوده فيه

رماد الجثه و الورود و الشموع و الصور و العروسه الخشب اللى عليها هدوم الطفل

بالاضافه لترجمه الكلمات الغريبه اللى كانت مكتوبه بالسنسكريتيه على مقدمه المذبح

كل ده طبقا لكلامهم بيدل على ان اوليفيا كانت بتمارس الطقوس الوثنيه دى

ونجحت فعلا فى خلق التولبا لروح ابنها ايدن

وانه هو اللى عمل فيها كده و اتسبب فى وفاتها بعد ما فقدت السيطره عليه

زى ما قالت بنفسها فى الرساله اللى لقيوها

طب ايه هو باه كائن التولبا دا وازاى بيتحضر

التولبا باختصار شديد هي عباره عن مجموعه من الطقوس و الاعمال السحرية البوذية القديمة

وفيها بيقوم الشخص بخلق او بتخيل كيان موجود فى عقله هو بس

وبيمنح الكيان الخيالى ده شكل و كمان اسم

و بيبدا يتعامل معاه كانه حاجه حقيقيه موجوده فعلا

الكيان ده ممكن يكون اى حاجه

ممكن يكون صوت معين او انسان او حيوان او حتى جماد

و مع الوقت بيبتدى الكيان ده يستقل بذاته و ينفصل عن الشخص اللى عمله

خلى بالك دى طقوس سحريه قديمه

واللى بيمارسوها بيشبهوا الموضوع زى الجنين اللى بيتخلق فى رحم الام

و بعد فتره بيتحرر من الرحم و بينفصل عن امه و بيقدر يعيش لوحده

وفيه ناس تانيه بتقول ان الموضوع ده مش حقيقى ولا يتعدى الخيال الشخصى بس

بمعنى انك لو صدقت حاجه و اتعاملت معاها على انها حقيقه

بيبتدى عقلك يخيل ليك انها حقيقه و بتتحول لواقع قدامك شايفه بعنيك

وعلى الرغم من ان الحادثه دى قديمه وعدى عليها سنين كتير

الا ان البيت لسه موجود لغايه دلوقتى

و محدش عنده الجرأه انه يشتريه او حتى يسكن فيه

و بتدور حواليه اشاعات كتير عن اصوات مرعبه بتطلع منه

و انه مسكون بالارواح الشريره و الاشباح

و فى سنه 2005 فيه عالم متخصص بالحاجات الخارقه و الماورائيات

اسمه درو نافارو حضر لبيت اوليفيا علشان يدرسه و يشوف حكايته ايه

ساعتها قال انه زار مواقع و اماكن كتير

بس البيت ده مختلف تماما عن كل المواقع دى

وان فيه طاقه غريبه محسش بيها قبل كده فى اى مكان تانى

وانه اول ما دخل لبيت اوليفيا حس بخنقه و مكنش عارف يتنفس و قلبه كان بينبض بشده

و نصح بضروره الابتعاد عن المكان و تجنبه

لانه مش قادر يحدد طبيعه الحاجه اللى بيتعامل معاها جوا البيت

ياترى ايه اللى حصل لاوليفيا

ازاى الشرطه لما دخلت البيت لقت جثتها متعفنه و متوفيه بقالها فتره

وفى نفس الوقت تلاقى رساله مكتوبه بخط ايديها و مترخه بتاريخ نفس اليوم اللى لقوها فيه

مين اللى اتصل بالشرطه من جوا البيت اكتر من مره مع ان البيت مهجور و مفيش حد فيه

هل موضوع التولبا ده حقيقى ولا لأ

اسئله كتير محدش قدر يجاوب عليها

وتفضل قصة اوليفيا مابيل واللى حصل معاها لغز كبير غير مفسر حتى الان

اتمنى تكون القصة عجبتكم و بشكركم جدا على حسن المتابعه

والى اللقاء فى قصة جديده

والسلام عليكم و رحمه الله و بركاته

 

تعديل المقال