لغز منارة ايليان مور أين اختفى العمال الثلاثه؟
زمان كان الانسان بيستخدم النار علشان يدل السفن و يعرفها بمكان الارض القريبه منها
او علشان يرشدهم و هم بيعبروا الممرات البحريه الخطيره
و كان بيعمل كده عن طريق انه بيولع نار على تل عالى وواضح و قريب من شط البحر
علشان السفن تشوف النار دى و تعرف الارض فين
و بعد فتره كبيره من الزمن
بنى الانسان المنارات علشان تقوم بالمهمه دى
بس الشغل فى المنارات دى مكنش اى حد ممكن يقبل بيه
بسبب ان مكان المناره بيكون منعزل و بعيد
و فى اغلب الاحيان بتكون على ارض صخريه فى منطقه مقطوعه مليانه بالمخاطر
و كمان اللى بيقبل يشتغل فيها بيضطر يقضى فتره كبيره
مع زمايله بعيد عن اسرته و بعيد عن اى مظهر من مظاهر المدنيه و الحضاره
دا غير ان مكان المناره بيكون زى ما قولنا قريب من البحر
و فى مناطق خطيره و سط الميه و العواصف و الظروف الجويه السيئه
اللى ممكن تسبب مشاكل كتير للعمال دول
ومن اشهر الحوادث الغريبه اللى ليها علاقه بالمنارات
هى حادثه حصلت فى مناره كانت موجوده على جزيره فى اسكتلندا
و المناره دى كان بيشغلها 3 عمال
بس فجاه اختفى العمال ال 3 دول من المناره و من الجزيره كلها فى ظروف غامضه
وماسابوش وراهم اى اثر ممكن يكشف لنا هم راحوا فين او ايه اللى حصلهم
حنتكلم النهارده عن مناره "ايليان مور"
التى إختفي عمالها الثلاثة بطريقه غريبه من غير اى اثر
علشان يفضل اسم المناره دى مربوط بلغز كبير محدش قدر يحله او يلاقيله تفسير لغايه
دلوقتى
فى مجموعه من الجزر الصغيره
الموجوده على مسافه حوالى 150 كيلومتر شمال غرب شواطئ اسكتلندا
مجموعه الجزر دى اسمها "جزر فلانان"
و اتسمت بالاسم ده نسبه لواعظ ايرلندى عاش فى القرن 17 على جزيره من مجموعه
الجزر دى
اسمها جزيره "ايليان مور" او "الجزيره الكبيره"
المنطقه دى كانت معروفه بظروفها الجويه السيئه و رياحها الشديده
دا غير انها كانت محاطه بالاساطير و القصص الخياليه
و خصوصا جزيره "ايليان مور"
الجزيره دى بالذات مكنش حد بيقدر يزورها
الوحيدين اللى كانوا بيروحوا هناك هم مجموعه من رعاه الاغنام
ورعاه الاغنام دول مكنوش بيباتوا او بيرضوا يفضلوا على الجزيره ابدا بليل
كانوا بيغادروا الجزيره دايما قبل الليل ما يدخل عليهم
ودا علشان اعتقادهم بان الجزيره دى مسكونه بالاشباح و بالارواح الشريره اللى ممكن تاذيهم
وكانوا بيحموا نفسهم من الارواح دى عن طريق بعض الطقوس و الاعمال
اللى كانوا بيادوها علشان تحميهم و تبعد عنهم اذى و شر الارواح دى
دا غير السفن و القوارب اللى دايما كانت بتغرق و كل البحاره اللى عليها بيموتوا
بسبب الطيور العملاقه اللى كانت بتهاجمهم
او بسبب الصخور الحاده اللى بتظهر فجاه من العدم و تخبط فى السفن دى و تغرقها
و اساطير تانيه كتير احاطت بالجزيره
وعملت لها هاله من الغموض و الرهبه خلت الناس تبعد عنها
و اتحولت لجزيره مهجوره ومنعزله وغير ماهوله
وفى اواخر القرن 19
قرر المسئولين بناء مناره على اعلى مكان موجود فى جزيره ايليان مور
وبالفعل بدا العمل فى بناء المناره سنه1896
و كانوا حريصين انهم يبنوا مناره قويه محاطه بسور
يحميها من الرياح الشديده و العواصف اللى كانت المنطقه دى مشهوره بيها
وبعد 3 سنين تم الانتهاء من بناء مناره ايليان مور و اصبحت جاهزه للعمل سنه1899
و كانت شغاله بصوره طبيعيه و بكفاءه عاليه
لدرجه ان الضوء اللى كان بيطلع منها كانت السفن ممكن تشوفه من مسافه 40 كم جوه البحر
عمال المناره كانوا مسئولين عن اعمال المراقبه و عمل الصيانه و الاصلاحات
و غيرها من الاعمال اللى بتضمن ان المناره تفضل شغاله
و بتقوم بمهامها فى ارشاد و هدايه السفن
العمال التلاته دول هم :-
"جيمس دوكات" 43 سنه و "دونالد ماكارثر" 40 سنه و "توماس مارشال" 28 سنه
كانوا بيقضوا فتره المناوبه بتاعتهم لمده اسبوعين فى المناره
بعيد عن اى اى منطقه ماهوله و من غير اى وسيله اتصال مع اى حد
وفضلوا لمده سنه كامله مشغلين المناره بطريقه ممتاذه و بكفاءه عاليه
وبعدين بدا غموض مناره ايليان مور
وابتدت الاحداث المثيره و الغريبه تحصل
يوم 15 ديسمبر كانت السفينه الامريكيه ارتور بقياده الكابتن "هولمان"
معديه على مسافه قريبه من الجزيره
ولاحظ الكابتن "هولمان" ان المناره اللى على الجزيره مش شغاله
وعلى طول بعت رساله للمركز الرئيسى يبلغهم فيها باللى شافه
بس رسالته موصلتش بسرعه للاسف
و الغريب ان كان فيه تلسكوب موجود على جزيره "لويس" القريبه من "جزيره ايليان مور"
و كان وظيفته هى مراقبه المناره و انتظامها فى العمل
الا ان العامل المسئول عن المراقبه و اسمه "رودريك ماكنزى"
ملاحظش ابدا ان المناره مش شغاله و ان مفيش ضوء خارج منها
يمكن علشان كان فيه موجه من الضباب الشديد غطى الجزيره فى الفتره دى
الاجراء الطبيعى فى الظروف اللى زى دى
ان لجنه تطلع على المناره علشان تشوف هى عطلانه و مش شغاله ليه
و تشوف العمال اللى مسئولين عنها ليه مش بيقوموا بعملهم
الا ان و لسوء الحظ الاجراء ده اتاخر اسبوع كامل
بسبب موجد شديده من العواصف و الطقس السئ نزلت فجاه على الجزيره
ومكنش حينفع ابدا اى تحرك او عمل اى حاجه فى الظروف الجويه الصعبه دى
علشان كده و لمده اسبوع كامل فضل الموضوع مبهم
و محدش عارف ليه المناره مش شغاله و فين العمال التلاته اللى على جزيره ايليان مور
وفى يوم 26 ديسمبر سنه1900
اتحركت السفينه "هيسبيريوس" بقياده الكابتن "جيمس هارفى" فى اتجاه مناره ايليان مور
وكانت محمله بالاكل و الشرب و كل الامدادات المطلوبه
و كمان كان موجود عامل اسمه "جوزيف مور" علشان يحل محل واحد من العمال
التلاته الموجودين فى المناره
ولما قربت السفينه من رصيف الجزيره
استغرب الكابتن جدا
كان المفروض يلاقى واحد على الاقل من العمال الموجودين فى المناره واقف مستنيه
بس مفيش حد
و كمان علم المناره مش مرفوع كالعاده
فقام الكابتن بنفخ بوق السفينه علشان ينبههم انه موجود
و برضوا محدش ظهر
بعت لهم اشارات ضوئيه
برضوا ولا حياه لمن تنادى
مفيش اى اثر لاى حد موجود على الجزيره
الجزيره دى مفيش عليها اى اثر لاى انسان
مكنش فيه غير اصوات الطيور و امواج البحر و هى بتصطدم بالصخور
فاضطر كابتن السفينه انه يبعت العامل "جوزيف مور" و معاه فرد تانى من طاقم
السفينه للجزيره
علشان يشوفوا ايه الموضوع الغريب ده
و بيقول "جوزيف مور" فى تقريره انه لما كان بيقرب من المناره هو و الفرد اللى معاه
شعر بشعور غريب و برهبه كبيره
لدرجه انه فكر انه يرجع تانى للسفينه و ميكملش
الا انه تمالك نفسه و كمل طريقه للمناره
و لما وصلوا للمناره كان باب المناره مفتوح
ودى حاجه غريبه جدا
لان المفروض ان باب المناره لازم يكون مقفول كويس
بس على العكس كان الباب مفتوح
ولما دخلوا جوه المناره لاحظوا ان فيه بالطو واحد مقاوم للماء موجود و متعلق على الشماعه
مع ان المفروض انهم يكونوا تلت بلاطى بعدد العمال التلاته
طيب فين الاتنين التانيين
وكان الجو مليان رطوبه و بروده شديده دليل على ان مفيش اى نار تم اشعالها جوه
المناره من فتره
وكمان لاحظوا ان ساعه الحائط اللى كانت متعلقه فى المدخل كانت واقفه و مش شغاله
الاتنين رجاله دول كملوا تفتيش جوه المناره
فى محاوله منهم انهم يلاقوا اى حاجه تكشف الغموض ده
ولما وصلوا لمطبخ المناره
كان المطبخ نظيف و مترتب و الاطباق كانت مغسوله و محطوطه فى مكانها
بس لاحظوا ان كان فيه وجبه اكل جاهزه موجوده على الترابيزه
بس محدش قربلها او كل منها
ولقوا كمان كرسى من الكراسى مقلوب على ضهره
زى ما يكون الشخص اللى كان قاعد عليه قام فجاه و بستعجال كبير
من الحاجات الغريبه كمان انهم لقوا السراير بتاعت العمال التلاته مترتبه و محدش
لمسها
و مصابيح الاضاءه كمان كانت نضيفه ومليانه بالوقود بس محدش استخدمها
وكان فيه قفص طيور جواه طائر كنارى على وشك الموت من شده الجوع
ولقوا كمان ان الكشاف الرئيسى للمناره سليم وجاهز و مفيش فيه اى عطل او اى حاجه
تمنع انه يشتغل
كل ده و مفيش اى اثر لاى عامل من عمال المناره التلاته
وهنا حس مور و زميله بالقلق
و قرروا الرجوع للسفينه و ابلاغ الكابتن بكل اللى شافوه
فقرر الكابتن انه يسيب تلت عمال تانيين فى المناره علشان يشغلوها
و بعت رساله للمركز الرئيسى حكى فيها كل اللى حصل ده
وكل اللى شافه مور و زميله لما دخلوا المناره
وبعد كام يوم ابتدا التحقيق فى الموضوع
وكان رئيسفريق التحقيق واحد اسمه "موير هيد"
و تم الكشف عن بعض التفاصيل الغريبه اللى زودت غموض اللغز ده
زى وجود بعض الحبال المفروده على الصخور
فى حين ان الصندوق الخاص بالحبال دى مش موجود
وكمان تلف جزء كبير من السور الحديد اللى بيلف حولين المناره
بالاضافه لضياع عوامه نجاه كانت موجوده فى المناره و مش عارفين راحت فين
بس الاهم من دا كله هو اللى لقوه مكتوب فى سجل المناره
لما لقوا السجل الخاص بالمناره و اللى بيتسجل فيه الاحداث اليوميه المهمه اللى
بتحصل
لقوا ان العامل "توماس مارشال" كاتب يوم 12 ديسمبر
ان فيه عاصفه شديده جدا بتهاجم الجزيره
و ان واحد من زمايله و هو العامل "ويليام ماك ارثر" كان بيبكى
و يوم 13 ديسمبر كتب انهم بقوا محبوسين جوه المناره بسبب العاصفه
و انهم كانوا خايفين جدا
و اخر ملحوظه كتبها ويليام فى السجل
ان العاصفه انتهت و ان مياه البحر اصبحت هادئه و ان الله فوق الجميع
بس الغريب ان المركز الرئيسى مسجلش اى عواصف هاجمت المنطقه دى ايام 12 و
13 و 14 ديسمبر
على العكس تم تسجيل الطقس فى الايام التلاته دول على انه هادئ و مستقر
و اللى اكد الكلام ده
ان المناره نفسها كانت مرئيه و بصوره واضحه لجزيره لويس القريبه منها خلال الايام
3 دول بالذات
ومكنش فيه اى عواصف ضربت المنطقه دى الا يوم 17 ديسمبر
يعنى بعد كام يوم من الاحداث دى
و بعد ما انتهى موير هيد من التحقيق كان التفسير الوحيد اللى وصله
هو ان اختفاء العمال التلاته كان نتيجه نزولهم يوم 15 ديسمبر
لمنطقه قريبه من المنحدر الغربى للمناره
علشان يجيبوا صندوق الحبال قبل ما يضيع او يتكسر على الصخور
بس هاجمتهم موجه كبيره ظهرت فجاه من البحر جرفتهم و وقعتهم من المنحدر و
غرقوا فى الميه
دى كانت النتيجه النهائيه للتحقيق
بس تفضل بعض الاسئله اللى فشلت نتيجه التحقيق دى فى الاجابه عليها
يعنى مثلا ليه البلاطى او السترات المضاده للميه مفقود منها اتنين
وواحد بس اللى موجود فى مكانه جوه المناره
بمعنى تانى
ليه العامل التالت ملبسش الستره او البالطو بتاعه و هو خارج يامن صندوق الحبال مع
زمايله
رغم ان الجو كان بارد جدا وفيه عاصفه شديده بره المناره
الحاجه التانيه ان العمال دول كانوا عمال متمرسين و عندهم خبره بالقوانين
و القوانين بتمنع ان التلاته يغادروا المناره مع بعض
لازم يفضل حد جوه المناره
فايه السبب اللى خلاهم يغادروا كلهم و يسيبوا المكان فاضى
دا غير ان عمال بالخبره دى المفروض انهم كانوا حذرين جدا من الامواج
و من الصعب انهم يقعوا و يغرقوا بسبب موجه مهما كانت كبيره او قويه
و بعدين حتى لو ده حصل ففين جثثهم مظهرتش ليه
ثم ان اخر ملحوظه كتبها توماس مارشال فى سجل المناره
كانت بتقول ان العاصفه هديت و الجو بقى تمام
اسئله كتير محدش قدر يجاوب عليها
و لغايه دلوقتى مظهرش اى اثر لعمال مناره ايليان مور
او اى دليل ممكن يفك طلاسم اللغز ده
بس ظهرت بعض النظريات اللى حاولت تفسر اللى حصل للعمال التلاته
اول نظريه بتتفق تماما من التقرير النهائى اللى كتبه موير هيد بعد ما انتهى من
التحقيق
و هو ان العمال التلاته غرقوا فى البحر بعد ما سابوا المناره علشان ينقذوا صندوق
الحبال
او ان واحد بس فيهم طلع للصندوق بس وقع من على الجرف الغربى
و ساعتها اتحرك الاتنين عمال التانيين علشان ينقذوه
بس جت موجه كبيره و جرفت التلاته و غرقتهم
و فيه نظريه تانيه بتقول ان العمال التلاته سابوا المناره و الجزيره كلها بمزاجهم
هربا من الحياه الصعبه على الجزيره
او ممكن يكونوا اتخطفوا مثلا
و نظريه تالته بتتوقع ان احد العمال فقد عقله وقتل زملائه و بعدين انتحر
دا غير النظريات اللى بتتكلم عن الفضائيين اللى خطفواالعمال
او الوحوش البحريه العملاقه اللى طلعت من البحر و اكلتهم
او البوابات الزمنيه اللى عدوا منها لمكان و زمن تانى
و مع مرور السنين و انتهاء التحقيقات
و قفل قضيه الاختفاء الغامض لعمال مناره ايليان مور
الا ان تاثير الحادثه دى فضل مستمر لسنين
و فضلت البلاغات الغريبه من العمال اللى اشتغلوا فى المناره بعد كده
كانوا بيشتكوا انهم بيسمعوا اصوات غريبه
وكانت الاصوات دى بتهمس باسماء العمال التلاته اللى اختفوا
دا غير البلاغات عن وجود طيور عملاقه و شكلها غريب موجوده على الجزيره
و فضل الوضع على كده لغايه اوائل السبعينات
وقتها تم تحويل المناره الغريبه دى لمناره اتوماتيكيه زى باقى المنارات
و مبقاش حد بيروح هناك الا كل فتره علشان اجراءات الصيانه المعتاده
و بيتقفل ملف مناره ايليان مور للابد من غير ما نوصل لحل نهائى للغز اختفاء عمالها
التلاته
و بكده نكون وصلنا لنهايه القصة
وبتمنى تكون نالت اعجابكم
و الى اللقاء فى قصة جديدة ان شاء الله