السلام عليكم و رحمة الله و بركاته
قصتنا النهارده حصلت فى العصور الوسطى
و بالتحديد فى القرن 12
فى قريه اسمها "وولبيت"
بتتبع مقاطعه "سوفولك" فى انجلترا
القريه دى كانت قريه زراعيه مشهوره بصيد الذئاب
وفى يوم مشمس من ايام فصل الصيف
و اثناء موسم الحصاد
كان الفلاحين موجودين فى الارض بتاعتهم بيجمعوا محاصيلهم الزراعيه كالعاده
وفجاه ظهر ليهم طفلين اغراب عن القريه واقفين جنب حفره
كان الفلاحين عملينها علشان يصطادوا بيها الذئاب
الطفلين دول كانوا ولد و بنت
بس كان شكلهم غريب اوى
كان لون جلدهم اخضر غامق
ولابسين هدوم غريبه جدا
وكانوا بيتكلموا بلغه عجيبه و مش مفهومه
وكانوا بيبكوا بصوره مستمره
وكانت ملامحهم بتميل للملامح الافريقيه
و بسرعه الفلاحين اخدوا الطفلين الاغراب دول
وراحوا بيهم لبيت كبير القريه و اسمه السيد "ريتشارد"
ووقف عدد كبير من الفلاحين برا البيت
علشان يتفرجوا على الاطفال الغريبه دى
و يعرفوا جم منين وحكايتهم ايه
شك السيد "ريتشارد" ان الاطفال دى ممكن يكونوا مصبوغين باللون الاخضر
وان اللون ده مش لون جلدهم الحقيقى
علشان كده مسك ايد البنت و قعد يفرك فيها بقوه و يغسلها
ظنا منه ان كده ممكن يزيل اللون الاخضر من على بشرتها
بس اتفاجئ ان اللون مطلعش
و ان ده هو اللون الحقيقى للبشره
وبعد الدهشه و الاستغراب
امر السيد "ريتشارد" باحضار بعض الطعام للاطفال دى علشان ياكلوا
لانهم اكيد حاسين بالجوع
بس الاطفال قعدوا يبصوا للاكل ده باستغراب شديد
ماكانوش عارفين ايه اللى اتحط قدامهم ده
وكانهم ماشافوش اكل قبل كده
ورغم الجوع الشديد
الا انهم ماكلوش اى حاجه من الاكل اللى جالهم ده
وفضلوا لمده خمس ايام كاملين من غير ما ياكلوا اى حاجه
عايشين على شرب الميه بس
ودا طبعا خلاهم يحسوا بالضعف الشديد
والسيد "ريتشارد" مكنش عارف يتصرف
او يعرف ايه نوع الاكل اللى ممكن ياكلوه
لغايه ما الاطفال دى شافوا بالصدفه قرون الفاصوليا الخضرا موجوده مع بعض الفلاحين
ساعتها اندفعوا ناحيتها و فضلوا ياكلوا فيها بمتعه كبيره
ومن ساعتها و هما مابياكلوش غير الفاصوليا الخضراء
بس للاسف بالرغم من ان الفلاحين عرفوا اخيرا نوع الاكل اللى ممكن الطفلين ياكلوه
الا ان حاله الولد الصحيه كانت اتدهورت بدرجه كبيره
ومات بعد شهر تقريبا
اما البنت فصحتها اتحسنت
و اشتغلت خادمه فى بيت السيد "ريتشارد"
و مع الوقت
اتعودت تاكل بعض انواع الاكل التانيه غير الفاصوليا الخضراء
فابتدى لون بشرتها الاخضر يختفى
وواحده واحده
ابتدت تتعلم بعض كلمات اللغه الانجليزيه
وبعد شويه وقت
لما عرفت تعبر و تتكلم
سالها السيد "ريتشارد" عن حكايتها هى و اخوها
كانوا عايشين فين
وجم هنا ازاى
وفين اهلهم
وكانت اجابتها غريبه جدا اصابت السيد "ريتشارد" بالدهشه و الذهول
لما السيد "ريتشارد" سالها الاسئله دى
جاوبته البنت بان الارض اللى كانت عايشه فيها
مفيش فيها شمس زى الشمس دى
كانت الاضاءه الوحيده اللى موجوده هى ضوء الغسق المستمر
وكانت فيه ارض تانيه موجوده جنب ارضها
والارض دى كانت دايما منوره بنور دايم و شديد
وكان في نهر او بحر كبير بيفصل ارضها عن الارض التانيه دى
وانها هى و اخوها كانوا بيرعوا حيوانات ابوهم فى المرعى
وفجاه سمعوا اصوات اجراس ضخمه بترن فى السما
فغابوا عن الوعى
ولما صحيوا لقوا نفسهم موجودين فى القريه دى
فحسوا بخوف شديد من منظر الشمس و ضوئها الشديد و من الفلاحين اللى مسكوهم
هى دى كل المعلومات اللى كانت البنت عارفاها
ومفيش اى حاجه زياده
و فضلت البنت عايشه فى بيت السيد "ريتشارد" لغايه ما كبرت
و يقال انها اتجوزت و اختفت بعدها
وفيه اقاويل تانيه بتقول انها ماتت بعد الجواز بفتره
و اندفنت فى مقابر القريه جنب اخوها
واصبحت قصه اطفال وولبيت الخضر حاضره بقوه فى الفولكلور الشعبى الانجليزى
لدرجه ان شعار القريه بيمثل الطفلين اللى ظهروا فى حفره صيد الذئاب
يا ترى القصه دى حقيقيه ولا مجرد قصه خياليه
وايه هو مصدرها
القصه دى ليها مصدرين
اول مصدر هو كتاب باللغه اللاتينيه
عنوان الكتاب ده هو "تاريخ الشئون الانجليزيه"
و المؤلف هو راهب و مؤرخ انجليزى عاش فى الفتره من 1136 حتى 1198
و اسمه "ويليام اوف نيوبورج"
و بيقول فى كتابه انه نقل القصه دى من شهود موثوق فيهم جدا
اما المصدر الثانى فكان كتاب برضوا مكتوب باللغه اللاتينيه وكان بعنوان تاريخ انجلترا
وكان لراهب انجليزى اتوفى سنه 1228
وكان اسمه "رالف كوجشيل"
وطريقه سرد الكتابين دول للقصه متشابهه لحد كبير
الا ان "رالف كوجشيل" ذكر فى كتابه انه سمع القصه دى من السيد "ريتشارد" نفسه
و بيقول كمان ان الاطفال دى لما سمعوا صوت الاجراس
كان الصوت طالع من كهف قريب من المكان اللى كانوا بيرعوا فيه الحيوانات
ولما الاطفال دخلوا للكهف ده علشان يدوروا على مصدر الصوت
تاهو و ما عرفوش يرجعوا تانى
و بعد فتره من الزمن لما خرجوا من الكهف
لقوا نفسهم فى قريه وولبيت
وطبعا فيه تفسيرات كتير للقصه دى
منها ان القصه كلها من اولها لاخرها ما هى الا حكايه خياليه من الفولكلور و الاساطير الشعبيه الانجليزيه
وان الولد و البنت دول كانوا مجرد طفلين تايهين فى الغابه
وان الكلام اللى البنت قالته مجرد حكايه من خيالها الفتها علشان تنال اهتمام سكان القريه
اما التفسير التانى ان القصه حقيقيه فعلا
وان الطفلين دول من اطفال المهاجرين الفلامنج
وان اهلهم اتقتلوا فى الحروب اللى كانت موجوده فى الفتره دى
وهرب الطفلين لقريه وولبيت
اما بالنسبه للغتهم الغريبه
فكانت اللغه الفلامنجيه اللى طبعا سكان القريه مش حيفهموها
وبالنسبه للون الاخضر فكان نوع من مرض فقر الدم
اللى بيعمل بقع خضرا على الجلد
ولما اتغير نظام الاكل بتاع البنت
ابتدت تخف منه و اختفى اللون الاخضر من جلدها
التفسير ده منطقى بنسبه كبيره
بس فيه هنا سؤال
.png "طفلان بجلد أخضر ظهرا فجأة… وما قالاه حيّر العالم!")
ازاى مفيش اى حد من سكان القريه يعرف شعب الفلامنج
او اللغه الفلامنجيه
خصوصا السيد "ريتشارد" اللى استضاف الطفلين فى بيته
ازاى مقدرش يتعرف على لغتهم و خصوصا انه كان متعلم وممكن يعرف الحقيقه بسهوله
التفسير التالت انهم مجرد طفلين من ابناء الخدم فى منطقه تانيه
وهربوا من اهلهم وجم القريه دى
وتفسيرات تانيه كتير بس اغربها ان الاطفال دى من كوكب تانى او انهم من سكان جوف الارض
محدش عارف اى التفسيرات دى هو الصحيح
بس الاكيد ان قصه اطفال قريه وولبيت الخضر
كانت مصدر وحى و الهام لكتير من الكتاب
منهم الشاعر و الناقد الانجليزى "هيربيرت ريد"
واللى كتب روايه بتعتمد فى احداثها على قصتنا دى
و الكاتب جون ماكلين صاحب كتاب غرائب الاقدار اللى الفه سنه 1965
و بيتكلم فيه عن طفلين لون بشرتهم اخضر
ظهروا سنه 1887فى قريه اسبانيه اسمها "بانجوز"
و ان عمده القريه دى ساعد الطفلين زى ما عمل السيد "ريتشارد" مع اطفال قريه
"وولبيت" بالظبط
وفيه كتاب اسمه "30 ظاهره خارقه حيرت العلماء"
ودا لكاتب مصرى اسمه الاستاذ "راجى عنايت"
بس قال فيه ان الاطفال دى حصلت فى اسبانيا مش فى انجلترا
واخيرا يبقى السؤال الاهم لحضراتكم
القصه دى حقيقه ولا خيال
وايه تفسير حضراتكم للقصه
هل حصلت فعلا ولا مجرد اسطوره
اتمنى تكتبوا رايكم فى التعليقات
وهنا بتنتهى قصتنا
و اتمنى انها تكون عجبتكم
الى اللقاء فى قصه جديده
والسلام عليكم و رحمه الله و بركاته