طفلان بجلد أخضر ظهرا فجأة… وما قالاه حيّر العالم!

ذكريات من المستقبل

القصه المذهله لاماديوس دي ناخ

دا اسم الكتاب اللى اتنشر سنه 1972

واللى اثار دهشه و ذهول العالم كله

بسبب موضوعه و القصه اللى بيتكلم عنها

القصه دى كانت بتعتمد على مذكرات كتبها واحد اسمه 

بول اماديوس دى ناخ

و بيحكى فيها عن تجربته الغريبه اللى عاشها

لما نام و دخل جسمه فى غيبوبه لمده سنه كامله 

وخلال السنه دى سافر بوعيه للمستقبل البعيد 

و كانت روحه ساكنه فى جسم بنى ادم تانى

عايش فى سنه 3906

ودا خلاه يشوف و يتعرف على دنيا تانيه خالص 

غير الدنيا اللى كان عايش فيها قبل ما ينام

الغريب باه ان المذكرات دى اتكتبت سنه 1924

ورغم كده قدرت توصف كتير من الاحداث المهمه و الحروب و الاختراعات 

اللى حصلت فعلا بعد تاريخ كتابتها بمئات السنين و بدقه كامله

ايه هى حكايه اماديوس دى ناخ و مذكراته

تابع القصة علشان تتعرف على الحكايه الغريبه دى

بس ماتنساش لو القصة عجبتك تسيب رأيك في تعليق

ويلا بينا نبدا قصتنا

                                                                                    

اتولد اماديوس دى ناخ سنه 1884 فى سويسرا 

و بالتحديد فى مدينه زيوريخ

وكان طفل عادى جدا عايش حياه طبيعيه زى غيره

وبعد ما انهى دراسته و اتخرج من الجامعه 

اتعين كمدرس للغه الفرنسيه

وكانت حياته ماشيه بصوره طبيعيه جدا

ولما بقى عنده 33 سنه يعنى فى سنه 1917

اتصاب اماديوس بمرض اسمه التهاب الدماغ الخمول

او مرض النوم

 ودا مرض غريب انتشر فى اوروبا فى الفتره من 1916 لغايه 1924

و كان مسبب مشكله كبيره للاطباء فى الوقت ده

و الشخص اللى بيتصاب بالمرض ده 

كان بيدخل فى فترات طويله و متكرره من الغيبوبه

وللاسف كانت نسبه مش بسيطه من المصابين

 بيدخلوا فى الغيبوبه دى ومبيصحوش منها 

و بيفقدوا حياتهم قبل ما يصحوا  

ولما وقع اماديوس فريسه للمرض الغريب ده

بقى ينام فجاه و بدون مقدمات و يدخل فى غيبوبه

و الموضوع ده بقى بيتكرر كتير

و كان بيفوق بعد دقايق او حتى ساعات

بس فى اوقات تانيه 

كانت الغيبوبه دى بتستمر لفترات طويله بتوصل لايام

ولما كان بيصحى و يفوق منها

مكنش بيفتكر هو نام ازاى او ايه اللى حصله  

وفضل الحال على كده لغايه سنه 1921

فى السنه دى حاله اماديوس بقت سيئه جدا

و بدأ موضوع الغيبوبه ده يتكرر بشكل كبير و على فترات قريبه

لغايه ما نام فى مره و دخل فى غيبوبه استمرت لسنه كامله

وخلال السنه دى كان موجود تحت الملاحظه الطبيه

فى مستشفى من مستشفيات زيوريخ 

و بعد سنه كامله فاق اخيرا و استرد وعيه

و كانت صدمته كبيره لما عرف ان والدته اتوفت

اثناء ما كان فى الغيبوبه الطويله دى 

وبعد كام يوم استرد صحته و اتحسنت حالته

وخرج من المستشفى 

بعد كده سافر لليونان علشان يشتغل مدرس للغه الفرنسيه

وهناك اتعرف على واحد اسمه جورجيوس 

و بقوا الاتنين اصدقاء مقربين لبعض

و فى سنه 1924 قرر اماديوس انه يسيب اليونان و يرجع تانى لسويسرا

وقبل ما يسافر سلم مذكراته اللى كان كتبها فى الفتره اللى فاتت لصديقه جورجيوس

المذكرات دى كانت مكتوبه باللغه الفرنسيه 

وقبل ما يديله المذكرات خد منه وعد انه حيحافظ عليها و على سريتها

و ان الكلام و الاحداث اللى حيقراها فى المذكرات دى

تفضل بينهم هما الاتنين و مفيش اى حد تانى يعرفها

فوافق جورجيوس و استلمها منه

و بدأ فى قرايتها و ترجمتها للغه اليونانيه

و مكنش يعرف ان الكلام المكتوب فى المذكرات دى حيصدمه 

و حيعمل تغيير كبير جدا فى حياته

 اماديوس كان بيحكى فى مذكراته عن التجربه الغريبه و المذهله اللى عاشها

و الاحداث العجيبه اللى مر بيها

اثناء الغيبوبه الطويله اللى دخل فيها سنه 1921  

و بيقول اماديوس انه فاق من الغيبوبه و استرد وعيه بطريقه مفاجاه

ولما صحى اتفاجئ بانه عايش جوه جسم غير جسمه

كان جسم شخص تانى

وانه موجود فى مكان غريب جدا

مليان بحاجات و اشياء مش معروفه و اول مره يشوفها

و الناس اللى كانوا حواليه كانوا لابسين لبس غريب و مش مالوف 

و كمان كانوا بيتكلموا بطريق و بلغه مش مفهومه اول مره يسمعها

ودا خلاه مش قادر يفهمهم او يتواصل معاهم

لغايه ما جابوا جهاز شكله غريب

وباستخدام الجهاز ده ابتدوا يفهموه و يتكلموا معاه

فسالهم اماديوس عن المكان اللى هو موجود فيه 

و سبب و جوده فى المكان ده ووصل هنا ازاى

وكانت اجاباتهم على اسئلته سبب فى اصابته بالصدمه والذهول  

قالوا له انهم مجموعه من الاطباء مسئولين عن علاجه

لانه اتعرض لحادثه سير بعد ما صدمته سياره كهربائيه طائره

وان المكان اللى هو موجود فيه ده هو المستشفى

و ان تحقيق الشخصيه اللى معاه بيقول ان اسمه اندرياس نورثام  

وانهم موجودين فى سنه 3906

اماديوس مكنش قادر يستوعب ولا يصدق الكلام اللى هو بيسمعه ده

وحاول انه يفهم الاطباء دول ان اسمه الحقيقى هو بول اماديوس دى ناخ

مش الاسم اللهم هما قالوا عليه ده

وانه عايش فى زيوريخ فى سويسرا و انهم فى سنه 1921

الغريب ان الاطباء بعد ما سمعوا كلام اماديوس

مظهرش عليهم اى رد فعل 

ولا استغراب ولا دهشه ولا اى حاجه

زى ما يكونوا كانوا متوقعين الكلام اللى سمعوه من المريض اللى قدامهم

وردوا عليه بانهم متعودين على الحاله اللى هو فيها دى 

و انها اتكررت كتير مع اشخاص تانيين غيره

وهى حاله بتخلى الانسان يعيش فى زمان و مكان تانى

مختلف عن مكانه و زمنه الحقيقى اللى هو عايش و موجود فيه فعلا

بس بيتنقل و يعيش فى الزمان و المكان الجداد دول بوعيه بس مش بجسمه

و ان جسمه بيفضل موجود فى زمنه و مكانه الحقيقى

بعد كده اتكلموا معاه عن اهم الاحداث و الحروب

اللى اثرت على كوكب الارض

وغيرت بشكل كبير فى مستقبل الانسان و حضارته البشريه

الكلام كله كان منحصر فى الفتره من القرن الواحد و العشرين

و القرن ال 39 اللى هما عايشين فيه

ومحاولوش فى كلامهم انهم يحكوا له 

او يجيبوا سيره اى حاجه حصلت فى القرن العشرين

اللى هو الحاضر بتاعه او القرن اللى هو عايش فيه وجاى منه 

لانهم خافوا انه لو عرف اللى حيحصل فى الزمن اللى هو عايش فيه

ممكن يحاول يغير فى الاحداث  

وبالتالى حيغير فى المستقبل وفى التاريخ كله 

علشان كده متكلموش معاه عن القرن العشرين خالص

و بيقول اماديوس فى مذكراته

ان فى القرن العشرين و بدايات القرن الواحد و العشرين

زاد التلوث البيئى و زادت الحروب فى العالم

واخترع الانسان اسلحه جديده و فتاكه زى القنابل النوويه

وزاد عدد السكان بشكل كبير 

وقلت الموارد الطبيعيه لكوكب الارض

و مبقتش كافيه لعدد السكان الرهيب ده

فظهرت المجاعات و زادت الكوارث الطبيعيه و الحروب و النزاعات

ومع بدايه الالفينات زاد معدل التنافس على التسليح بين الدول

و تم اهدار نسبه كبيره من الاقتصاد و الموارد على سباق التسليح ده 

و بعد فتره ضعف الاقتصاد العالمى بشكل كبير

و مبقتش الموارد الطبيعيه قادره توفى باحتياجات العدد الضخم لسكان كوكب الارض

ومع زياده الازمه

فكر الانسان انه يحتل كوكب تانى و يعيش فيه

ووقع اختياره على الكوكب الاحمر او المريخ

وابتدى فى حل المشاكل الفنيه اللى بتمنعه من انه يتنقل و يعيش على المريخ

وفى سنه 2204 نجح الانسان فى حل المشاكل دى  

وبنى مدينه كبيره على كوكب المريخ

سكن فيها حوالى20 مليون انسان لفتره كبيره من الزمن

بس للاسف فى سنه 2265 اتعرضت المدينه دى لكارثه كبيره حصلت على الكوكب

و الكارثه دى كانت سبب فى التدمير الكامل للمدينه

و فناء كل البشر اللى كانوا عايشين فيها

و من ساعتها محاولش الانسان انه يكرر التجربه تانى

او يبنى اى مدينه على كوكب خارجى مره تانيه

ومع قله الموارد و زياده السكان و صعوبه الحياه على الارض  

زادت المناوشات و الصراعات بين الدول

لغايه سنه 2309 

فى السنه دى اشتعلت حرب نوويه عالميه كبيره و شرسه جدا

استمرت حوالى 80 سنه

كانت نتيجتها تقليل عدد الجنس البشرى بنسبه كبيره

و قاره اوروبا اتدمرت بالكامل و مبقتش صالحه للحياه

و فى سنه 2396 اتلغت الحدود بين الدول

وبقى العالم كله عباره عن دوله واحده ليها برلمان واحد

و بتحكمها حكومه واحده بيتم انتخابها بشكل ديمقراطى

والحكومه دى بتتكون من علماء و خبراء اقتصاديين و مثقفين

ومع بدايه القرن ال 24 اتلغت الفلوس

وتم توزيع الموارد الطبيعيه و الثروات الموجوده 

على جميع السكان بالتساوى و العدل

فانتهت المجاعات و اختفى الفقر

واتحلت كل المشاكل البيئيه و التلوث اللى كان موجود

فقرر الانسان انه يبدا من جديد بعد الاحداث المؤسفه اللى مر بيها

وتم انشاء تقويم جديد للعصر الجديد

بدايته هى تاريخ انشاء البرلمان العالمى الموحد

التقويم ده بيبدا يعد من السنه واحد ميلاديه

اما العصر القديم فتقويمه بينتهى سنه 2396

و انتهت كل مشاكل الانسان و بدا مرحله جديده من وجوده 

وعصر زهبى جديد بتقويم جديد استمر حتى سنه 3906

السنه اللى زارها اماديوس دى ناخ 

القصه و الاحداث الغريبه اللى قراها جورجيوس فى مذكرات صديقه

خلته يطبعها و ينشرها فى كتاب سماه

ذكريات من المستقبل

القصه المذهله لاماديوس دى ناخ

و تم نشر الكتاب فى سنه 1972 

وبعد نشره قابل كتير من الاعتراضات و التكذيب

ومحدش كان مصدق الكلام و الاحداث اللى اتكتبت فيه

وقالوا انها مجرد تخاريف من شخص مريض او مجنون

وتم اختبار المذكرات دى و تبين انها حقيقيه

و مفيش شك انها اتكتبت فعلا سنه 1924 

و بيفضل هنا سؤال مهم و محير

ومحدش لغايه دلوقتى قدر يجاوب عليه

هو ازاى اماديوس عرف التفاصيل دى كلها

ازاى اتكلم عن الطاقه النوويه و القنابل الذريه و الحرب العالميه التانيه

مع انه كتب مذكراته دى سنه 1924

يعنى قبل الحاجات دى كلها بسنين طويله

طب عرفها ازاى 

علشان كده حيفضل لغز مذكرات اماديوس دى ناخ 

من اكتر الالغاز المحيره حتى وقتنا هذا

تعديل المقال